अपघातजनयित्री विदेशमहानौका गृहीता; त्रीणि
मरणानि।
गोश्रीपुरम् (कोची )> गोश्रीपुरे
मत्स्यबन्धनाय गतायां यन्त्रनौकायाम, महानौकायां घट्टितायाम्
अप्रत्यक्षभूतानां त्रयाणां कर्मकराणांम् मृतदेहा: पश्चात् उपलब्धा:।
कुलच्चिलस्वदेशिन: तम्पि दुरै इत्यस्य, असमस्वदेशिनो: द्वयोश्च
मृतदेहा: तथा प्राप्ता:। नाविकसेना तीरसंरक्षणसेना मत्स्यबन्धनकर्मकरा: च
मिलित्वा अन्वेषणं कृतवन्त:। तन्मध्ये, यन्त्रनौकया सङ्घट्य
अपघातकारिणीम् महानौकां प्रत्यभिज्ञातवन्त:। पनामायाम् पञ्जीकृता
भारवाहिनी महानौका "आम्बर् " नामिका एव अपघातकारिणी। गोश्रीपुरात् अष्ट
नोट्टिक्कैल् मैल् मितं दूरं गताम् महानौकां नाविकसेना अगृह्णात्।
महानौकाया: मुख्यनेतृसहितान् प्रति नरहत्यायै नियमपत्रं दास्यति इति
गोश्री नगरारक्षणमेधावी एम् पी दिनेश: न्यवेदयत्। राष्ट्रान्तरनियमान्
अपि परिगण्य नियमरक्षानिर्णय: स्वीक्रियते इत्यपि स: उक्तवान्। प्रात:
सार्धद्विवादने पुतुवैप्पिन्स्थानकात् विंशति: नोट्टिक्कल् मैल् मिते
दूरे अपघात: प्रवृत्त:। यन्त्रनौकायां विद्यमानेषु चतुर्दशसु जनेषु
एकादशजना: रक्षाम् प्राप्तवन्त:। दिनद्वयात्पूर्वम् मत्स्यबन्धनाय
निर्गता "कर्मलमाता " नामिका यन्त्रनौका अपघाते पतिता। यन्त्रनौकाया:
गति: महानौकानाम् मार्गेण नासीत् इति कर्मकरा: उक्तवन्त:। प्रात:
अपघातसमये अन्या यन्त्रनौका एतेषाम् समीपे आसीत्। उच्चै: शब्दं श्रुत्वा
आगता: तस्या: यन्त्रनौकाया: कर्मकरा: रक्षाप्रवर्तनं कृतवन्त:। अपघाते
मत्स्यबन्धननौका पूर्णतया विनष्टा। रक्षितान् एकादशजनान्
फोर्ट्कोच्च्याम् आतुरालयम् प्रावेशयत्। एतेषु द्वयो: स्थिति: अतीव
गुरुतरेति कारणात् एरणाकुलम् सर्वकारातुरालयंम् प्रति तौ परिवर्त्य
प्रवेशितौ।।